ओझेलमा शिवजट्टा पर्यटकिय स्थल बाटो निर्माणका लागि स्थानीयहरुले माग

धरान । दुई बर्षअघि तत्कालिन पाँचकन्या गाविस धरानमा गाभिएपछि अहिले धरान उपमहानगरपालिकाको २१ नम्बर वडामा रहेको शिवजट्टा पर्यटकिय गन्तव्यको प्रचुर सम्भावना भएर पनि ओझेलमा परेको छ । धरान बजारबाट करिब ५ किलोमिटर उत्तर पुर्वमा अवस्थित शिवजट्टा धार्मिक पर्यटनको सम्भावना बोकेको स्थल हो । यसको प्रचार प्रसार गर्न सके धार्मिक पर्यटन सहित प्राकृतिक पर्यटकको विकाश गर्न सकिन्थ्यो ।  धार्मिक ग्रन्थमा उल्लेख भए अनुसार हिन्दुका आराध्यदेव शिवले सतीदेवीको शव बोकेर भौतारि हिड्दै गएको अवश्थामा विस्तारै सतीदेवीको शरीरको सबै अंग पतन भइसकेपछि शिव जीको चेत खुल्दा आफ्नो शरीर ज्यादै फोहोर पाए पछि उनले यही शिवजट्टाको झरनामा नुहाएको किवंदन्ती छ । नुहाउने क्रममा उनको जट्टा त्यस ठाउँमा झरेकाले नै यसलाई शिवजट्टा भनिन थालिएको स्थानिय जमानवीर राई बताउनुहुन्छ । शिव जट्टालाई शिव बास बसेकाले शिवकुण्ड पनि भनिने गरिएको उहाको भनाई छ ।

धरान उपमहानगरपालिकाको २१ नम्बरमा पर्ने यस शिवजट्टामा झरना बगीरहन्छ । नजिकै शिवालय पनि छ । धरानबाट करिब ५ किलो मिटरमा पुर्व उत्तरमा रहेको यस झरनामा साउन महिनामा नुहाउदा रोगव्याधी हरण हुने विश्वास छ । झरना नजिकै शिवालय छ । कच्ची बाटो बनेपनि शिवजट्टासम्मै भने छोएको छैन । थोरै पैदल हिड्नुपर्छ । पर्यटकीय गन्तव्यको प्रचुर सम्भावना भएर पनि ओझेलमा परेको ठाउँ हो शिवजट्टा । यसको प्रचार, प्रर्वद्धन र विकासमा कसैको पनि ध्यान पुगेको छैन । विश्वकै उदाहरणलाई हेर्ने हो भने पनि पानी प्रति पर्यटकको आकर्षण बढ्दो छ । तर धरानमै चौबिसै घण्टा पानी बगिरहेने ठाउँ हुँदा पनि त्यसलाई धरानले पहिचान गर्न नसकेको पर्यटन व्यवसायी बासुदेव बरालको भनाई छ । धरानमा पानीको अभाव भईरहँदा शिवजट्टामा झरनाबाट पानी बगिरहेको छ, यसलाई धरानेहरुले नदेखिरहेको उहा बताउँहुन्छ् । पानीमा रमाउन चाहने पर्यटनको विकाश गर्न सम्बन्धित निकायले पनि ध्यान दिन नसकेको उहाले बताउनुभयो । त्यहाँ सम्म जाने बाटो निर्माण र त्यसको प्रचार प्रसार गर्ने हो भने प्रकृतिक रुपमा मनोरम शिवजट्टा ओझेलमा नपर्ने उहाको भनाई छ ।

तराईका क्षेत्रमा रहेका पर्यटकलाई नजिकै रहेको झरनाले आकर्षण गर्न सक्ने उनको दाबी छ । धरानमा पर्ने दुई ठुलो खोलामध्ये सेउतीको शिर पनि शिवजट्टा हो । झरना पुग्ने बेला पुल तर्नु पर्छ । करिब दुई घण्टा अधिकांश सिधा बाटो र थोरै उकालो बाटो हिडेपछि गन्तव्य आइपुगिन्छ । झरना पुग्नुअघि स्थानियवासीले बनाएको मन्दिर छ । केही वर्ष अघि सम्म शिवरात्रीका दिन भारतका जोगिहरु आएर धुनी बालेर ३ महिना सम्म बस्ने गर्दथे । तर पछिल्लो समय जोगिहरु आउँन छाडेका छन् । काठमाडौंको पशुपति क्षेत्र भन्दा पनि बढी शिवजट्टाको महत्व रहेको कथन छ । धार्मीक महत्व बोकेको यस धार्मिक स्थलको प्रचारप्रसार गर्ने हो भने यहाँ पनि धेरै श्रद्धालु भक्तजनहरु आउन सक्ने थिए । त्यहासम्म पुग्ने बाटो निर्माणका लागि स्थानीयहरुले माग गरेका छन् ।