पर्यटकीय सुन्दरता थप्दै लसुन स्तम्भ

तेह्रथुम । तेह्रथुमको लालीगुराँस नगरपालिका स्थित लसुने बजारबासीले पर्यटकहरुलाई आकर्षण गर्न पहिचान झल्कने लसुनको पोटी आकारको लसुन स्तम्भ निर्माण सँगै पार्यटकीय सुन्दता थपेको छ । लसुने बजारको ऐतिहासिक पहिचान समेत झल्काउने र पर्यटकहरुलाई आकर्षण गर्न भन्दै स्थानीयले ९ लाख रुपैयाँ बढीको लागतमा स्तम्भ निर्माण गरेका हुन् ।

पर्यटकीय क्षेत्रहरु तीनजुरे मिल्के जलजले, रातपोखरी, पात्लेपोखरी र आकर्षक चिया बगान लगायत क्षेत्रमा आउने पर्यटकहरुको आवत जावत भइरहेको लसुने बजारको मुख्य चौकमै स्थानीयबासीले लसुनको पोटी आकारकै स्तम्भ निर्माण गरेका हुन् ।

स्थानीयबासी, गाविस र अन्य दाताहरुको सहयोगबाट गरी कुल ९ लाख ७ हजार १ सय ५५ रुपैयाँ लगतमा स्तम्भ निर्माण गरिएको निर्माण समिति संयोजक धर्मराज खड्काले जानकारी दिए । बाउबाजेले खोरिया फाँडेर लसुन खेती गर्ने गरेको र लसुनकालागि ख्याति प्राप्त क्षेत्रमा बस्ती विकास भएपछि बजारको नामपनि लसुने बजार राखिएको थियो ।